該搵個經濟學家解釋下新樓供應嘅問題

啱啱喺 business insider 個網睇到有人挑剔克魯明嘅分析，話利率走趨同新建住宅落成係「冇關係嘅」。OK, 又湊下熱鬧，分析下香港個樓市，睇下到底大家由朝驚到黑嘅「息魔」有冇料到。

結論係：我唔識睇，唔該搵個經濟學家出嚟解下畫。

因為假如經濟學家解唔到畫，即係要由政治學家解畫。而且個結論仲好鬼難聽。

是咁的：翻查香港過去接近二十年數據(政府統計年報)，集中在「私人住宅落成量」呢一項，個圖係咁嘅：

其實所謂「重災區」時代，係大約1998到2002年。當年有大量私人住宅供應，最高峰1999年，有超過三萬五千個。之後再有高峰在2002年出現。其後供應量一路縮水，即使到最近炒樓炒到人都癲嘅2014年，都只係「反彈」返去萬五個單位左近。

咁樣「細水長流」，豈只一句「供不應求」可以形容，根本就係同冇供應差唔多啫。

之咁，「利息」的確同供應好似完全無關係咁樣，甚至只係見到「負關係」而唔係正關係。乜解?

回顧1998年至現在嘅「利息」係咁嘅：

係咪好神奇呢?

照計：利息高、成本高，價格會跌，然後供應會縮。之不過，從利率走趨嚟睇，根本係掉番轉。嗱，呢啲完全違反經濟定律嘅嘢，我就無謂認專家嘞。唔該搵個自認經濟專家嘅嚟睇睇。如果唔係，後果只會係由政治家去睇。

以前英國佬有個口頭禪嘅，就係「如果唔自律，就立法規管」。咁唔知而家個政府又想點呢吓?

其中一個既乎合經濟原理，又解到政治現實嘅情況係：重點唔係成本同價格，而係發展商持有土地和空置樓盤嘅機會成本!

當利率偏低，持有土地同樓盤嘅機會成本亦都偏低，因此發展商根本唔急於放售或放租套現。咁就一切都迎刃而解嘞。因此才會出現「利息越低、供應越少」嘅情況。呢種情況叫「屯積」。

當然，絕X對係合法嘅，假如法律容許的話。於是乎大家開始明白點解香港人越嚟越「懷念前朝」啦!

唔自律，就立法侍候! 呢樣係英國佬留低嘅金科玉律「積極不干預」原則。