我覺得呢…..真係有人想整死阿梁生囉! 不過本土同飯民都冇咁嘅功力，慳啲啦 baby。
今次一周一行安排，完全殺梁振英政府一個措手不及。她指出，中央原定昨日、即星期一早上通報港府，然後才正式公布，特區政府預先並不知情。深圳當局一直不想改變現時安排，但「中央」有令，不敢不從，只能將一腔怨氣發洩在無能的特區政府身上；因為深圳認為問題根源是梁振英政府沒能力處理好問題，才導致港人怨聲載道。於是深圳有人提早兩日、即在上周六在網上率先「爆料」，弄得港府高層人仰馬翻，急急查證事件，漏夜開會商討如何回應。
這個情況，有好多層意思，不止「面黑」咁小事囉，因為以阿梁生嘅習慣，佢不論如何都會認為自己功勞最大，無謂拗。自由行係「內交」問題，呢點佢吹水吹咗好鬼耐。
真正大鑊嘅原因係，第一：香港商界即時發火，警告會有三千人失業同埋大量企業倒閉。至於有幾真實? 可以交由歷史說明，不過好鬼肯定，先前打死要賺自由行錢嘅「老細」就一定比梁特「更為面黑」。第二，即使係原本想做「和事老」嘅財團，就更加欲哭無淚，成個落馬洲購物城計劃，即時四腳朝天! 咁搞法，你想人哋點樣幫你做規劃呢? 出錢出力、嘔心瀝血，原來都係表錯情!
至於本土派，大肆宣佈「初步階段性勝利」! 由是更加聲威大振，全世界團團轉咗幾年，佢哋一腳伸過去，咁就搞掂咗。不過李慧玲那一句「中央」指示，先至係驚天動地泣鬼神嘛，唔通「本土」可以直駁中央乎? 香港政壇而家邊個話緊事吓?
照道理，如果生意唔受影響，咁香港啲商家當然無必要牙痛咁聲。不過實情可能「更淒涼」，因為香港商家終於要面對一個好殘酷嘅現實，就係「自由行經濟真係完全靠深圳話事」，而家只要深圳政府「隻眼開隻眼閉」，咁樣香港啲商家先至有運行! 我覺得真係慘過去乞米囉，香港啲商家，乜尊嚴都冇晒。
上一次梁特首靠「標準工時立法」呢張牌嚟撬走工聯會六十張選委提名票[3]。結果又係順得哥情失嫂意，基於商界反對，結果又係「走數」。今次輪到商界都走埋數。真係唔知條數點計。至於「政改」就更加唔使講，一早預咗過唔到。條數越走越大。
梁特一直吹到天咁高嘅所謂「內交」水平，到底又有幾真? 今次好明顯，係有人連呢個假招牌都拆埋。
二零零三年沙士（非典）肆虐香港，市道凋零。梁振英受時任特首董建華之託，在一個寒冷的春日飛往北京，為中央開放內地居民赴港自由行作最後破題商討。梁自知重任在肩，想早機去晚機回，好讓董建華早作部署，他連禦寒大衣也沒帶便上路了。到了北京直奔那位領導人家中，甫坐下，領導人劈頭一句：「梁振英，你好好考慮清楚了。中央不是不願撐香港，只是擔心我們這邊門一打開是關不上的。日後那麼多內地遊客去香港有可能引起逾期居留、治安等問題，香港承受得了嗎？」
而梁振英竟然大膽到連董建華嘅枱面都擒埋! 當時週刊如此引述：
我對那位領導人說，這些顧慮我們早就思考過了，既然中央支持開放自由行，香港會把所有準備工作都做好的。我們對香港的警察、海關、入境處的工作都有信心。….今日問梁振英，當時你何不請示董建華而先斬後奏了，萬一自由行出了問題負擔得起那責任嗎？梁坦言：「董建華給了我十足的授權」。
這段記錄，如果放在今時今日，大家會有啲乜嘢「反應」呢?
第一，
講古仔啫，使唔使咁誇? 「一個寒冷嘅春日…連禦寒大衣也沒帶…」
第二，
當時國家領導人的確對梁振英嘅辦事能力有保留，不過佢揼心口話佢一力承擔，呢張係「期票」嚟。
第三，
佢連董建華嘅功勞都借埋嚟用，直頭「碌爆卡」、連阿董生都「過咗一棟」。
第四，
交心俾商界，表明「雖然表面上乜嘢都冇做過」但係實在一直都係「默默耕耘」幫大家搵錢嘅 (唔係淨係唐生先至係商界嘅朋友)
畢菲特話齋：想知道邊個冇著泳衭? 水退你就知囉。
講到「彈票」呢家嘢，居然有人彈到中央頭上來! 後事如何，真係無謂斷估。又係花生賣斷市。
[1] 李慧玲「壹鍾定音」，2015年4月14日「做乜口頭邀功面色燶燶？揭CY畀深圳玩謝內情」http://hk.apple.nextmedia.com/news/art/20150414/19112252
[2] 2015年4月14日, 商務證秒殺一周一行, 淘寶5蚊有交易, http://hkm.appledaily.com/detail.php?guid=19112255&category_guid=4104&category=daily&issue=20150414
[4] 2011年 12月18日, 亞洲週刊 封面專題 「梁振英香港特首之夢迎接普選陽光」http://yzzk.com/cfm/content_archive.cfm?id=1364193493377&docissue=2011-50
沒有留言:
張貼留言