大家齊來找學校!

有圖有真相：我都好鬼憎人哋阻住啲無辜嘅小朋友返學同埋去面試。

不過到底灣仔以及中西區停課原因係佔中定只係教育局自己落閘? 大家試下齊來找學校。

只要在google 地圖上看看灣仔和中西區，再在「搜尋」選項打入「學校」，所有學校位置一目了然。唔信? 再到教育局網頁核對一下地址囉。至多另外再打埋中學、小學....任得你。

再核對佔中的影響範圍在港島區主要是「金鐘」。具體啲講，係政府總部添馬公園一帶。至於遮打道被警方封閉嘅道路，只係政總出面嘅干諾道中一段。

再拉近距離睇真啲。在區內「受影響」嘅學校，包括….李健駕駛學院同埋香港普通話專科…兩間咁大把。而且根本唔係「學校」。咪玩啦各位。

至於所謂「灣仔」受影響學校，其實連演藝都暢通無阻，其他沿住告士打道、金鐘道，算得上係學校嘅，都全部冇任何交通影響。至於金鐘至灣仔一帶，學校主要集中在半山堅尼地道。俾到盡，都係沿住灣仔道。之後就已經係銅鑼灣山邊、大坑道。至於崇光一帶，其實除咗「日語學校」，又阻住邊位呢?

至於中區學校，因為歷史原因，幾乎全部在半山! 而堅道完全冇受佔中影響。如果中環都冇事可以如常返工，又想知道比中環更遠離佔中地區嘅學校又如何受到影響呢? 催淚彈好似飛唔到咁遠啩? 除非用飛毛腿導彈嘅啫。如果警方真係有咁勁嘅大殺傷力武器，早響啦唔該。我要搵定防空洞。

過海交通方面：西隧、紅隧、東隧完全運作正常。小輪地鐵也運作正常。只是若干巴士路線有所改動。其餘服務中西區同灣仔區、同學校交通相關的接駁又完全冇影響。

真係諗到頭爆都諗唔到任何「停課」嘅理由。

看清楚家長的抱怨：不是「冇辦法返學」，而返唔到學嘅唯一理由是「學校停課」。而假如「灣仔及中西區學校因佔中而需要停課」，那麼請教育局長拿張地圖出嚟同大家核對下，是否真的「交通被切斷」或者學童安全會受威脅而不能不停課?

有圖有證據，各位關心子女學業嘅家長，又可以問下自己間學校，除咗因為教育局勒令停課之外，有冇具體返唔到學嘅原因。

歡迎指正!!!