唔包

講起呢個港人慣用嘅口頭禪，的確要佩服到五體投地。「在商言商」，呢句口頭禪簡直所向無敵、有殺冇賠。

例如：買電器唔包送貨、包送貨但係唔包安裝、包安裝但係又唔包保養；七秒之後如果產品出現問題，唔包退貨。即使要退貨都唔包退錢，請另外揀過一件……重新俾錢、送貨、同安裝。總之點都唔包保險啦。如有異議：收咗你錢嗰個有最終決定權。

即係 …. 包你個死人頭囉。人蠢冇藥醫，鬼叫你白痴，貪便宜幫趁山塞黑店吖啦。

其實香港除咗勝在有 ICAC, 應該仲勝在有 HKCC – 消費者委員會，假如遇到上述「不良銷售手法」，大可繩之於法。

之不過，假如你 buy 咗嘅，係一部《基本法》，咁出現以上呃錢走數嘅情況，唔知又有冇得「退貨」呢喂?  有就好囉。不過…..唔包!

今朝晨雞大早，就被譚慧珠姐姐嚇到三魂唔見咗七魄。大家見慣佢個樣就當然唔係呢個問題啦，而係佢非常字正腔圓地，重複以上嘅電器古感仔橋段：

包選舉啫、但係唔包普選喎；即使有普選，都唔包一定係直選 (唔要直唔通要孿?)，而即使係直選，都唔包冇人要篩過。然後再補充：選舉啫…唔包提名...提名啫，唔包被選喎。不論你點理解都好，最終解釋權都唔喺香港人呢邊。

不過以上都未夠震撼 。最震撼嘅係：當年英國佬賣咗你豬仔啦!  《公民和政治權利公約》? 其實《中英聯合聲明》同《基本法》….都一樣唔包嗰喎，乜冇人話過你知咩? 傻豬啦你。

可惜消委會真係唔包「政治承諾」呢家嘢，否則一早就應該按「不良銷售手法」拉哂啲人去坐監就大家條氣即刻順哂。