周融果然幫港出聲!

原本準備寫東北發展，但係呢條新聞太好笑。先寫為敬。

身為「中環人」，平日都飽受塞車之苦。不過周融代表《幫港出聲》昨日發表了一個報告，謂「佔領中環」一旦發生，全香港將會出現交通大擠塞，於是乎死人冧樓…..下省數十萬字。呢樣嘢就真係功德無量。

如果周融不是負責做「小罵大幫忙」的角色，還真以為他是替佔中做好通報工作，提醒各界愛國愛港嘅朋友：其實佔中如果出事，責任在於「政府根本冇應急交通預案」。呢個大忙，佔中各位真係要叩頭謝恩囉。而對於需要研究長遠解決中環塞車呢個問題，真係當頭棒喝也。

但凡有玩過詭辯的人都知道什麼叫做「無限上綱」，這是一個很好的示範。因為當中所謂的「後果嚴重」，是在於一個「假設」，就是車輛如果受到阻塞會發生什麼事。而當中這個「假設中的假設」就是「當車輛在發生阻塞的情況下而居然繼續使用原有的交通路線」來作出「推論」。

或者可以這樣用另一個情況來說明這個「假設中的假設」在什麼情況下會成立吧。

例如香港發生十號風球 (其實這個也經常發生嘛)，按照周融嘅理論：香港七百幾萬人其實一定全部都會在3個小時之內「死晒」，講清楚：係一定比周融的分析更為準確，一定在3個小時之內「死晒」。

是咁的：十號風球嘅情況下，全香港橫風橫雨、樹木倒塌、山泥傾瀉、風高浪急、四圍水浸..….但係全香港嘅人「一切照常活動」!

讀書做嘢嘅照常返工返學，師奶照樣出街買餸、巴士電車渡輪照常行駛，所有鐵路照常運作。而最堅抽嘅係：所有飛機照常升降!

於是就會發生以下「喪盡天良嘅人間慘劇」! 

飛機好似甩線紙鳶咁排隊插水就唔使講啦。911都係兩架飛機啫，香港今次破晒世界紀錄囉。而港鐵就無可避免發生漏電、死火、信號大亂、但係列車繼續照常入站於是不停炒車 (國情叫「追撞」)。而居然啲盲毛仲爭先恐後迫住擠上焚燒中嘅列車驚死無位坐，於是數以十萬乘客被燒死同人踩人踩死…無陰功啦! 唔使一粒鐘就死咁多人。

同時無數嘅師奶拖住啲小朋友去街市買餸 (咦? 明明話有x流感，唔好帶小朋友去街市….算，啲師奶做乜都得! 假設吖嘛!)，一落到街就被大風吹倒嘅禮義廉街板扑中個頭吐血身亡 (呢啲嘢又真係周街都有吖嘛)。而有幸未被擊中嘅少數勇武師奶繼續喺水淹及腰嘅環境下死拖住個小朋友向街市挺進。啲小朋友梗係唔浸死都肺炎啦，咁樣又死傷一大批。

而居然咁樣都唔死嘅師奶同埋小朋友，去到街市仲要喺狂風大雨之中同唔知點解繼續開檔嘅小販講價! 於是乎街市就不停有人被倒塌嘅雞籠果箱貨物等硬物擊中而相繼死亡。而且最離譜嘅係，啲無良嘅小販為咗繼續做生意，照常燈火通明，唔責死嘅師奶都漏電電鬼死晒。最恐怖嘅係，個蛇王丙唔知點解水浸都仲要開舖，結果舖頭啲蛇全部乘機游水逃生，街道上演「師奶大戰飯剷頭」，真係睇喪屍電影都無咁激呀。

而各路巴士繼續駛入經已水浸嘅過海隧道，於是馬路上浮屍多到撈唔切。而被迫停在車龍之中嘅巴士，繼續開住冷氣，咁當然過唔到三個鐘就汽油用盡、冷氣熄埋，全車乘客口吐白沫焗鬼死晒!  

而少數僥倖冇撘巴士嘅乘客，蜂擁擠上渡海小輪係都要過海，於是所有小輪在波濤洶湧嘅維多利亞港陸續翻沉，而船公司繼續加派船隻去接載未能上船而在碼頭鼓譟嘅乘客….成個維港好似鐵達尼現場一樣。不過啲人唔係爭住跳海而係爭住上船。咁死法，其實又真係唔使三個鐘咁多嘅。

至於啲警察喺呢三個鐘頭做緊啲乜呢? 之唔係按規定工作囉：咁鬼多嘢做，打撈浮屍同 call 白車都夠忙啦，仲要確保有更多緊急車輛駛入水氹同車死啲路人吖嘛。

所以話呢，周融真係明察秋毫、先見之明呀。之不過又唔知點解….打咗咁多次十號風球又唔見啲港燦死鬼晒呢吓?

大家而家明白「假設中嘅假設」係幾咁有用未?

好，而家睇番「佔中會塞車到死人」，係乜情況下發生：就係原本要打橫駛過中環嘅車，繼續打橫駛過中環。總之唔理三七廿一，死人冧樓都要繼續打橫駛過中環。

於是乎唔知點解，明明東區同西區都有醫院，啲救護車係都要將啲大肚婆東西兩邊車住去生仔。巴士公司自己繁忙時間都會避開擠塞地點啦，即使係好受歡迎嘅「循環線」都會去到中間就掉轉頭。但係偏偏就係佔領中環嘅時候就係都要直衝入中環?  咁聰明嘅喂?

而過海嘅三條隧道，其實紅隧一直都係塞到冇朋友，英國佬臨走都起好埋西隧。真係三條隧道死咁兩條都仲得，居然會癱瘓? 腦殘就差唔多。

因此所謂佔中而會塞車塞到死人，係只有一個情況底下會發生：就係負責維持交通嘅警務署唔單止冇分流預案，而且到時刻意唔理實際交通情況而老點所有車輛照常駛入中環!

呢種情況出現過未呢? 其實係出現過嘅…近似啫。大家如果唔係老人癡呆，應該記得2011年七一之後，有人衝出遊行路線瞓咗喺中環兩條街上面。據報當時逾千名人民力量及社民連的示威者分別佔據干諾道中西行線以及長江中心對開的皇后大道中。結果警方都係以「阻塞交通」為理由抬走哂佢哋。而長毛最後就變咗「小柏林」咁樣入咗冊。

不過那一次是在事前毫無預警情況下殺大家一個措手不及。但係佔中呢家嘢，講都講到蚊瞓。如果俾足一年時間通知，居然都無「交通應急預案」，咁唔知所謂嘅「塞車塞死人」又從何說起呢?

所以，大家應該多謝周融提醒，香港幾時都需要有交通應急預案。十號風球如是，佔領中環也如是。