政改要搞落區做蘇, 官府話: 出動全部三司十二局, 誓要全方位 "保駕護航"。 而慈母就正在練習新一輪 "防暴" 工作, 重點係 "練習現場搜證" , 即係費事有啲無聊人拎啲佢哋冇見過嘅錄影嚟頂證佢哋咁解啫; 至於錄影機有否 "鎮攝力"? 定還是 call 定消防隊, 試下 "開喉救火"? 睇怕到時先知點玩法嘞。
而同時所有社團都接齊柯打, 實行 "人民鬥人民"。 換言之, 今次落區做蘇, 個陣容將會係咁 :
- 移動城堡隊形 - 中間一粒豆豉咁上下嘅司長, 周圍幾十重慈母, 手執盾牌狗棍, 外面再加幾十層社團大媽阿叔跳廣場舞助慶。真係米奇花車大遊行都冇咁有趣;
- "做蘇" 隊形就係咁 - 台上一枝咪對住個司長, 左右一排冇人知佢係乜水嘅政助, 台下成個場都係社團, 會場之外就係幾十重慈母, 基本上同人大開會差唔多啫, 香港進步得真快
之不過, 選戰在即, 睇怕各路諸侯, 尤其是準備要靠選票埋班嘅, 肯定只會係得把口, 唔會認真, 費事蝕埋選票俾阿梁生, 反正完全冇著數, 手頭上都唔知幾多彈咗嘅票, 仲嚟? 但係又要交任務喎, 咁點算? 於是乎 "扮中立", 就係最明智嘅做法 - 一於每區搭台, 有人郁手就扮無辜, 冇事發生就 "成功爭取", 呢啲淨賺唔蝕嘅絕招, 明架啦!
至於電視台, 梗係加碼直播 "街頭魔法騙術" 啦, 當啲觀眾係狗咁玩就啱架嘞, 掟個波俾你自己去執囉 "典解會咁嘅"? ..... 都唔知玩得幾鬼咁開心, 仲邊得閒嚟煩你吖。
面對咁嘅陣容, 又唔知班飯記可以點搞喎? 反正都打晒開口牌, 完全冇必要去踩場。況且而家係考試季節, 斷估都冇乜學生得閒上街。
咁搞法.... 可能會係 "反高潮" 都唔奇喎, 隨時悶爆。想睇動物奇趣錄囉喎, 就梗係去海洋世界啦
有冇新意思破下悶局呀各位?
嗱, 長毛就起碼有啲意見 - 搞番個公投, 真係俾個政改過骨嘅, 佢話會辭職。之不過, 另外一位仁兄好似都講咗在先, 咁係咪買一送一打孖上先?
估佢唔到, 繼續食住花生等開場
沒有留言:
張貼留言