2015年6月18日 星期四

政改 - 阿爺的華麗轉身

當一啲事情發展到完全唔合邏輯嘅時候, 真係唔知可以用乜嘢方法去理解

我就有一個好有趣嘅推論, 大家不妨考慮 :係阿爺想泛民留低!

首先要恭喜泛民, 團結一致, 係最好嘅自保方法。今次投票結果係 - 28 v 8, 技術上嚟講, 八成 否決; 從未見過嬴咁大條街。

今次建制派缺席唔投票, 係最冇可能發生嘅事, 亦正因如此,成件事冇晒邏輯!

政改動議對泛民嘅壓力, 係反又死, 唔反又死, 只係差幾時。假如轉軚投贊成票, 即死。不過即使投反對票, 都只能 膠著; 2016年區議會同2017年立法會選舉, 泛民陣營將要面對 - 新勢力興起、舊勢力內鬥、加上建制派清剿, 無論點睇, 泛民應該都係要死。

但係在今次政改一役上, 在議會中嘅泛民居然 "大獲全勝", 咁就唔同玩法嘞, 有好靚仔嘅成績同選民交代, 隨時轉守為攻, 一鋪翻本! 即使唔大嬴, 但起碼都能保本嘛。

因此站在建制派要泛民清袋嘅立場, 建制派冇理由醒呢個翻身嘅機會俾泛民議員!

至於建制派自己, 既然接咗任務要投贊成票,而又預先打晒出口牌, 要 "拉布" 到星期五,爭取有人可以盡最後機會令到關鍵少數投誠。咁樣做好做醜, 都冇理由唔按本子辦事。 換言之,劇本改咗。但係如果要改,都一定唔會係前線班友仔自己夠胆去改。

而建制派一早已經全面動員, 亦都冇理由要担心下一輪選舉需要什麼 "票債票償", 因為反正係鐵票嘛。冇理由假設係因為劍橋老人院出咗事, 於是下次唔夠票喎。反而如果中途做咗 "逃兵",會令到一眾 "愚忠" 嘅師奶阿叔破口大罵、變成兩面不是人! 

因此站在建制派嘅立場, 最有利嘅,應該係坐定定, 舉定手,等收場,然後將隻鑊卸晒俾泛民班議員嘛。最有利嘅動作唔做,反而做一樣對自己最不利嘅嘢? 傻的嗎?

因此無論如何推理,撇開晒所有原本嘅思維同邏輯,結論都只可能得一個 : 阿爺急掟彎!!!

換言之,有人一直謊報軍情,話香港人為咗穩定可以做順民。而阿爺終於都知道,呢個講法, 係靠害嘅。因此為咗保住香港呢隻會生金蛋嘅肥鵝可以繼續生金蛋,一切以不變應萬變才是最安全, 於是 "唔該各位老朋友,捱多一次義氣"

於是才有這種完全唔合邏輯嘅安排 - 建制派好樣衰咁拉隊離場, 然後留低足夠人數唔使流會; 仲要主席都配合埋, 唔暫停等到 "阿發叔返嚟" 就即刻表決。而擺上神枱嘅,就正係交低咗棒俾個仔嘅發叔!

咁樣,成件事就通晒!

當然, 凡事都有後果, 而政治就更加唔會有免費午餐。後事如何,下回分解





2 則留言:

  1. 都係解唔通,即使建制派全部留低投贊成票, 政改都係不夠票通過,都係會保持現狀,根本唔使做咁大場龍鳳

    回覆刪除
  2. 賭到最後一秒, 泛民冇人轉軚, 而又俾人踢爆咗, 用唔到暴力, 咁點呀? 呢個再唔係過唔過到嘅問題, 而係點樣過唔到嘅問題。

    回覆刪除