2018年6月17日 星期日

愛國發財,香港利害


講到發國難財,香港人真係千祈唔好睇小自己

故事緣起中共再次打老虎,不過今次被拉下馬嘅,正正就係負責建造「國之重器」嘅航母建造公司老總。[1]

此案再次提醒各位,香港一直都係中共接通全世界嘅橋樑,而代為出招嘅高手,真係樣俾你睇。再次確認周星馳真係曠世奇才,連咁鬼刁鑽嘅哲學問題都一早俾破解得到。假如大家有睇《大密探零零發》,決戰紫禁之巔那一幕,應該都會深刻睇會到,何謂「邊個話武林高手就一定靚仔」?

高手,原來真係冇樣睇㗎各位!要你估佢唔到,先至係真高手嘛。

當初大家都覺得奇怪,點解做香港首屆特首嘅,會係一個睇起嚟同政治完全沾不上邊嘅老人家阿董。而事後證明,此人完全沒有半點做特首嘅本事兼條件。但偏偏這張龍椅又只能由他來坐。若非背後有重大原因,英明神武嘅鄧小平(又係冇樣俾你睇嘅)又點解會如此出手,經江澤民「握手欽定」。

事實從來都擺在眼前,只不過大家真係掛住睇熱鬧而唔係睇門路啫。

之前肥何出事,大家都只係冷嘲熱諷話乜嘢「白手套抵死」之類。而背後千絲萬縷幾乎抽得出老董,但係關鍵證人嘅「中間人」竟然「忽然流感暴斃」。大家又一味話佢抵死之餘,也又只係幾條友低聲細語,會唔會係「滅口」之流。結果此案由中央出面「劃清界線」,肥何只能自認倒霉,乖乖地洗乾淨個八月十五,留低一地花生殻。

今次更過癮,只不過「案件太普通」,於是各位又忽略咗當中同老董嘅關係。

是咁的,所謂「太普通」,就係「中國又拉大貪官」。呢種新聞,日日都有,麻木哂。之不過,唔該各位睇真啲,被拉嘅,係有份負責「中國第一航母」嘅軍工企業老總。因而又有可能係「滅口」之作。即使唔係,都起碼係劃清界線嘅動作。

又何解?

事關「中國第一航母」一事假如有任何冬瓜豆腐俾人查個水落石出,結果可能又嚟一次「中興」翻版,不過今 次會休克嘅,可能係成個中共軍工業!

而當年航母一事,極有可能同老董有關。假如大家查一下呢舊爛鐵嘅歷史,而且都係公開資料都睇得到嘅。[2]


1990年開始由蘇聯解體之後,之前由前蘇聯邀請衛星國烏克蘭代為建造的航母爛尾,直到1998年才成功甩手。而買家背景就一直係中共軍方(爭啲寫咗中國軍方,不過中國其實並無軍隊,只有中共才有軍隊,大家咪再搞錯)。出面站台的所謂「退休人士」何解會退而不休,化身成為「香港商人」,無端端拎一大筆錢出嚟,聲稱要「買嚟做隻賭船」?背後一直出錢出力嘅,當然係直達中央嘅資金鏈啦。人力物力都係由黨中央全力支持嘛。此事本無懸念。但係成件事都解釋唔到:點解明明係重大戰略設備,竟然可以光天化日之下、成功漂洋過海、萬里迢迢咁拖咗半個地球而最終可以順利落入解放軍手裡。

而呢段「航程安排」先至係「高手」發功嘅關鍵證據。而並非乜鬼「扮做開賭船」。

第一個有趣問題係:點解係1998

據報中共早在1995年已經想入貨,但係「未能得到政府批准」。所謂「原本不是中國或者軍方意思」,真係百份之一百「倒果為因」囉。各位,諗清楚啦,當初擺明係中共無辧法出面去買,因為係人都會聯想到目的係乜嘢嘛。而1997年之前,香港「坐館」嘅係英國佬,更加唔會出到所謂「購買批准」啦。

而完成購買戰略設備嘅買家,最後係香港公司。當中嘅交易條件,係「承諾不得用作軍事用途」。而呢樣嘢,其實私人公司係冇辦法自己認數㗎!因此先至有上面所謂「得唔到國家批准」嘅講法。而如果要香港代為認數,唔等到香港「回歸」,點樣可以做得到呢?

到底係邊個有權代表香港、以獨立國際貿易組織成員嘅名義,喺1998年出個「政府批准」嘅確認俾烏克蘭,證明呢間「香港公司」,真係唔會呃你呢?正正就係趁大家興高彩烈,全世界都仲以為香港「一切不變」嚟乘機出手嘛。

而第二個有趣問題係:又係邊個咁熟識國際航運,可以搞得掂個國際付運安排?

各位千祈唔好咁天真,以為拖住條船行半個地球係咁容易嘅事。即使係中共自爆嘅材料,都睇得出係幾咁驚心動魄嘅事。尤其係要聘請當時世界上技術最先進嘅荷蘭公司代為處理。呢點根本就已經唔係外行人識得安排嘅嘢。而事實上,中共官媒自爆嘅側面材料,都睇得出背後真係有高手。

據報導:解放軍就買船一事,找過兩個香港「著名商人」,都被「婉拒」.....最後找來退休軍人,但此人「確實不懂操作」.... 而負責找人的軍方都好明顯搵緊盲公竹,佢哋自己自然都唔識。[3]

咁到底呢兩個「被搵過嘅著名商人」,既被中共信任、又要熟識世界航運嘅,會係邊個呢?呢樣嘢冇懸念啦:香港兩個「航運世家」,都係世界級嘅船王家族,一家姓包,一家姓董。大家明白未?所謂「婉拒」,應該只係明燒棧道、暗渡陳滄之類而已。假如某位航運世家唔係幕後發功,中共成班盲毛點樣可以搬到條賊船返屋企吖?

正所謂紙包唔住火,中國明刀明槍咁樣買起航空母艦(連八噸圖紙!),表面聲明「完全不會用於軍事用途」而實際最後係正式武裝入列,仲要喺台海同南海耀武揚威,要盡力發揮所謂「震攝力」云云。果真是:厲害了、我的國!呢件明明係靠「虛假陳述」呃番嚟嘅「賊贜」嘛!

而正當中興一案踢爆原來中共係紙老虎,而美國佬對經濟目標,就已經落咁重手。咁樣對於重大戰略影響嘅軍備競賽,你估美國佬會「就住」咩?當年老鄧在生,尚且識得「韜光養晦」低聲下氣、掩人耳目,先至偷竊成功。如今眼見既已得米,就樂極忘形,慌死大家唔知你用賊贜?

至於最終會否立案調查,冇人講得實,不過有一件事係無容置疑嘅,就係:香港從來都係中共嘅「海盜港」。之不過,國難財,一直都只係少部份人識得去賺啫。

各位,唔該真係唔好睇小香港人賺錢嘅能力呀。




[1] 《中紀委深夜打虎,軍工企業二把手落馬》鳳凰網廣東報導,2018617
http://gd.ifeng.com/a/20180617/6660700_0.shtml

[2]睇睇維基綜合各方報導:https://zh.wikipedia.org/wiki/%E8%BE%BD%E5%AE%81%E5%8F%B7%E8%88%AA%E7%A9%BA%E6%AF%8D%E8%88%B0

[3] 《騰訊新聞》轉述《南方網》軍事要聞,2013410日,《揭秘:中國買下瓦格良號最初並非政府行為》https://news.qq.com/a/20130410/000261_2.htm


沒有留言:

張貼留言