先前提到美國失業情況, 總有人會衝出嚟話好嚴重。咁我不至於話唔嚴重。不過到底你用乜嘢時序同標準去理解呢件事? 總唔能夠撈亂嚟講。
人哋有失業救濟金,
香港冇, 呢樣已經恨唔到啦。
凡事總有數據可以參考,
至於信唔信, 各位自己 fact
check 囉。而除咗數字之外,
經濟結構同就業結構都唔可以亂咁比較。
第一個重點係:
美國其實有好多個「長週期」,
呢啲係大國經濟, 唔係一個城市經濟可以比擬。
五十年代之後嘅所謂黃金時期，其實都係韓戰結束之後先至開始。冷戰同越戰期間，其實美國就業情況大好。香港都係呢段時期開始食正條水，搵美國佬錢而發達。
到咗七十年代後半期,
直至列根上台之前十幾年，美國佬其實黑過墨斗;
當時反而係日本仔嘅黃金年代
, 亞洲四小龍就同樣受惠。至於日本仔財大氣粗到乜嘢程度?
各位冇親歷其景，好難想像。我剛好90年在歐洲讀書，就踫啱日本仔最風光時時候。撞啱蘇聯解體、中東戰爭，全世界都緊張咗一陣。日本仔反而定過枱油，而野村證券就最口響：現金存底淨係收利息，都夠所有人繼續如常出糧。對於想辭職出走嘅年青人，啲日本老人家有咁嘅規勸：嗱，你照出糧，出去環遊下世界先。到你返嚟想開工，出聲啦。咁當然, 迷失咗二十年, 啲老人家都死晒。仲邊有呢枝歌仔唱吖?
不過睇番美國,
其實一直主導世界經濟。有一樣嘢大家千祈唔好倒果為因-
列根執政初期, 失業率其實創下美國歷史高峰
! 超過10%。當時英國其實都緊隨 Reganomics , 大刀闊斧解散大型工會,
勇闖經濟轉型。短痛之後係長期繁榮,
最大鑊都只係中東戰爭期間,
失業率回升至 8%左右。但係與此同時,
蘇聯解體, 世界得番一個超強。所謂
87年金融風暴, 其實失業率真係冇乜表示。反而係科網轉型而多咗好多新工種出現。
再一次大鑊,
已經係好耐之後嘅事
: 2007/2008 次按風暴。美國大銀行都要攬救生水泡。而其後失業率就一直瀡滑梯,
跌到得4%以下。
但係結構上,
美國其實
"散工化"
咗好耐。貧富懸殊係事實、而生產外移尤其嚴重;
所謂全球化, 其實對美國打工仔係冇著數,
否則就唔會由侵侵打民粹牌上到台。所謂失業率低,
只係因為散工多咗,
唔係真係就業結構好咗。
所謂新經濟,
其實有幾多係食正散工化呢條水?
大家又不如自己計下數嘞。一個二個轉做網上自僱....
唔通就真係等如安居樂業?
不過散工化又唔可以一面倒睇死,
否則不如大家返去食國企大鑊飯啦。
疫情當下,
反而大量經濟活動轉型靠科網技術支撐住。而呢種經濟靈活性,
可能真係要到疫後重建先睇得出有冇實力嘞。
沒有留言:
張貼留言