買匯豐會變苦主, 點解買房託都會中招?

戴定頭盔先....

嗱, 各位兄弟, 唔係我講架, 係要斬, 你哋去斬高天佑啦!!!!

買匯豐會變苦主..... 竟然買 REITs 都會中招???

情況其實好唔同呀。

匯豐忽然彈弓手話唔派息 (又話英倫銀行唔俾佢派息.... ) 結果成班苦主嘈到拆天。

另一邊廂, 明明買房託一定派息, 點解又有另一班苦主.... 眼淚在心裡流呢?

原因唔係房託唔派息- 房託按信託契約一定要派息, 而且要派足九成，理論上冇得輸。輸得嘅, 其實係輸孖展!

高天佑個古仔我又唔懷疑佢真偽啦, 大家鬥唔開名啫.... 拎得出10億買房託, 好歹都每年收五六千萬啦啩? (香港房託大約 5%, 新加坡6%.... ) 就算係重災區嘅酒店房託, 富豪 1881.hk 都照樣派息, ($0.124, 按近期低水,息率近10%; 出年就唔知啦...小心時間差.) 因為係舊年賺嘅錢, 按信託契約, 今年冇得唔派。REITs 就係咁簡單。

之所以變苦主, 甚至俾人平倉清袋, 唯一原因, 係輸孖展之嘛!!!!!

係呀, 借錢好平, 2% 利息, 你套戥食息差, 睇落好禾味.... 之不過, 房託都有插水嘅時候, 一插穿補倉位, 除非你有米即時補倉, 否則真係就咁俾銀行割韮菜, 冇仇報。

睇番歷史, 你估房託冇插過水咩? 2007/08年次按危機, 一樣係插三成, 呢個係普遍正常情況；之後點樣升番上嚟, 係另一個話題 (嗱, 我冇教你撈底呀..... )。因此房託自己都定個規矩, 唔准借超過總資產 45%。而絕大部份都係借 20%; 就係要睇埋現金流, 預備唔會冇錢還債嘛。就算賤價拋售物業, 都唔會20% 都收唔番啫....

房託就諗盡方法去避險, 咁你去買房託, 反而唔諗風險, 真係關人隱事咩?

係要玩息差, 都唔該搵番隻 "方向相同" 嘅 underlying asset 啦.... 呢個係好基本嘅技術問題啫....

https://hk.finance.yahoo.com/news/%E6%96%B0%E8%81%9E%E9%BB%9E%E8%A9%95-%E6%BB%99%E6%8E%A7%E8%8B%A6%E4%B8%BBvs%E5%AF%8C%E4%BA%8C%E4%BB%A3-193600248.html