實在北京中央政府有幾重視香港區議會?

有朋友問起, 順手寫埋, 費事每次都要重複講多次 - 實在北京中央政府有幾重視香港區議會?

1.   民政事務署每年撥款三至四億俾區議會做「社區活動開支」, 所謂維穩費, 其實有好多係香港政府俾、唔係中央俾

2.   區議員薪金同埋津貼, 每年支出二十幾億, 唔止養起全班議員, 仲養起埋成個社區嘅政治樁腳

3.   配合政府主導公共工程撥款, 例如元朗一條天橋, 閒閒地都使你17億; 每個區都可以主導工程支出, 每年十八區起碼「分」咗過百億! 但係你要收粽地、拆僭建、起學校、起公園、起公屋.... 隨時阻你十年八年; 「地主會」都做唔到嘅嘢, 區議會一力承担 - 有本事配合政府阻住地球轉呀。

4.   非常重要嘅形象同樁腳工程- 區議員係「直選產生」, 每次有乜鬼咨詢, 就係"民意"; 幾百個"民意代表" 開會只係循例, 日日夜夜就搏命做民間外交、主導社區溝通、主辦社區組織、影響業主立案法團 (齋計維修工程已經肥死你啦) .....

假如只係為咗 "唔好俾佢有認受性" 就同區選割蓆, 甚至仇視參選人, 中央真係多謝夾唔該囉。因為所有榮光歸於中央丫嘛, 哈哈哈。

而最近為咗撐區選, 中央會去到幾盡?

1.   解放軍出營, 為咗幫手掃街搞親民! 仲要入晒陶傑嘅數, 當正係佢教路

2.   地區組織出手, 發動 "街坊清路障", 要挽回地區中間民心

3.   曾鈺成咁啱俾外媒訪問, 將矛盾卸晒俾林鄭, 甚至將建制派劃分開強硬與開明, 繼續 sell 開明建制派俾選民去支持

至於反送中班示威者, 把口就話 「各自爬山」, 但係一見到有人搶攻區議會陣地, 就屌到飛起。咁樣搞法, 個後果就不難想像：

1.      過咗區選, 就會由「民選代表」帶頭掃街 (其實係清路障), 「我要返工」、「俾番個和諧嘅香港我」…. 然後又係帶埋啲七老八十嘅阿伯, 等你唔敢動粗, 一次出事, 死一個阿伯立即全城圍屌, 等你唔跪低唔得; 以得失球嚟計, 食硬你呀

2.      對住全世界嘅傳媒大聲講：全港大部份冇上街示威嘅市民, 其實都係企喺政府嗰邊! 示威者唔係「民意代表」! 睇下你班所謂「為民請命」嘅傻仔, 仲有乜嘢光環同認受性? 全世界都睇你有冇票嘛!

3.      發動大清算, 到時各大學校長、中學校長唔就範嘅, 就日日有街坊嚟指罵, 直到政府換校長為止。「家教會」有啲乜嘢家長主席, 大家心照啦, 假如唔係開槍幾乎打死人, 大家根本都唔會留意到呀。到時學生同老師冇咗學校保護, 會發生乜事? 唔使劃出腸啦啩, 等瞓街啦你班廢青。「放棄一代年青人」唔止係一句口號嘛。

4.      發動民心大清洗：「修復警民關係」，到時全城都會見到阿Sir Madam 同街坊攬頭攬頸, 然後啲老人家就做晒和事老, 「大家都係一家人, 要守望相助」, 然後啲廢青繼續去坐監、然後啲發現屍體事件就「唔好再追究」, 大家「和好如初」。

呢個情景, 你話係唔係好振奮人心呢?

劇本就係咁寫嘅, 會否如計劃演出, 定還是會有突然變化? 呢樣就要睇下香港人自己造化囉。條路自己揀, 仆街唔好喊。