2015年8月31日 星期一

點解一定要有付出先至可以有要求?

邏輯思考都有兒童不宜嘅部份,未夠秤嘅,慎入。不另警告。

當然唔係講政治啦,如有聯想,實屬不幸。至於近年鋪天蓋地式清算香港廢青一事,似乎又以彈此調者為主,那當然更易惹人遐想囉。

或者這個邏輯難題從來也沒有多少人詳加留意才會出現混沌情況,這種腦殘現象,又比起我的胡思亂想更加不幸了。

是咁的,剛剛食完晏,飯氣攻心,一路行返公司、一路胡思亂想:點解做人嘅嘢,一定要有付出,先至可以有要求呢?

在香港這樣一個凡事以中環價值為核心的社會,有所謂「交易」這種思維方式主導很是平常。於是乎,「我有俾錢,就自然有權」。這是很普通的「消費主義」思維方式。至於冇俾錢、又多多意見嘅,「白撞」是也。

之咁…..這個邏輯是不是真的「冇問題」?

但凡重大的科學發現,往往都是由「不以常態觀世態」而得來。例如蘋果樹上熟,就一定會跌落地;很平常呀,「自古以來」就是如此嘛。不過只有牛頓一類異常的自閉仔,才會不理「自古以來」這種正向思維,提出「為何蘋果一定要往下掉?」這種無聊異見嘛。

胡思亂想之中,我發現這個「一定要有付出才可以有要求」的邏輯謬誤,可從以下事例找到反證,確認這個說法「很有問題」。

1 : 冇付出,但係有權諸多要求

某甲付出了十數萬元買一隻訂婚戒指,向心儀美女求婚。某甲當然「付出」了很多啦以現金計。但被求婚的美女是否因此而「不能提出任何要求」呢?

稍有常理的都會明白:梗係唔會啦白痴!

物質主義嘅美女,會要求「有樓有車有現金」啦;而純情嘅美女,會要求「唔准花心」之類。是常識吧?

但既然女方尚未答允婚事、又連戒指也未肯收下,又怎會「有權」提出許多無理取鬧的「條件」出來呢?

很簡單呀:雖未付出,但明知有預期要付出嘛!

唔信? 試下洞房嗰晚,唔俾個新郎哥入房吖….佢唔斬開你十八件先至奇呀。真係咁就一世喎,做新娘嘅,又唔知佢會唔會晚晚都咁勤力、又或者晚晚都唔勤力喎…. 點算先?

於是答案就很明顯了吧:但凡有需要付出,即使係「未來式」,都一樣有權作出要求。這是一個「合理預期」的問題。因此不要以為你「已有付出」才有權作出要求,「未有付出」的,可能才是最終有權決定提出要求的一方。

唔想咁樣,可以點樣? 古人就很有見地,發明了「搶婚」這種「適度有為」的合理合法措施,後來就更加經過最高權威嘅列祖列宗按「無後為大」嘅基本革命原則加以規範化,以「童養媳」的制度來確立香火不斷的重大文明使命。

直至有些不知好歹的外國勢力,認為近代民族英雄王老虎先生這種霸王硬上弓的「顯示大國實力」行為非常不文明,強詞奪理地橫加干預,才令到一眾男士要面對斷子絕孫嘅風險,真係亡我之心不死呀該煨。

2:有付出,但係冇權要求

某乙喜歡收集日本國寶:光碟。尤其是某位女優的出品,熱情打造、真心投入、勇冠三軍嘅演出,簡稱 - 打真軍製作。

這位仁兄簡直可以用「愛到發燒」來形容對那位女優的一片痴心。並且主動成立「我愛女優後援會」(簡稱「愛字頭」),但凡這位女優一有新碟推出,愛字頭一定動員一切資源加以購買吹捧。對於其他雜牌女優,一定噓到爆燈,打擊抹黑無所不用其極,但求心愛的女優可以繼續成為「眾望所歸」的藝能界別代表。

愛字頭當然認為女優應該非常「感恩」咁話啦。而某乙亦在這種良好感覺之中渡過了不知多少個年頭,近乎「非女優不娶」咁滯,直頭熱情到要「含宅終老」嘅程度。

好不容易,終於等到某一日,女優答應出席一個愛字頭搞嘅簽名會,並且準備好大批禮物,回贈一眾粉絲。於是乎某乙興奮到要搵醫生打鎮靜針;或者順手打番幾箱十全大補針都唔定,須知搏命自製興奮,後果係幾鬼嚴重嘅。

到了女優出席當日,某乙代表愛字頭拜見女優,但係一手掃開所有禮物,直接提出要求:我要同你打真軍!

女優可以點回應呢又?

冇錯,某乙付出咗大量嘅時間、精力、金錢,連名譽地位都押上了,換取一眾愛字頭對女優嘅支持....。之不過,人哋賣藝啫,唔係賣身嘛。就算某乙想賣身俾人拍AV,都唔該問過人哋導演同監製吖,排隊面試做演員,然後排下檔期囉。拍AV都有規有矩嘛!

當然,人哋正正就係因為有規有矩,先至做到AV大國。咁某乙又能否用香港邏輯嚟同人哋理論呢又? 例如「我喺海邊起咗棟酒店,冇理由個海濱專區唔歸我管喎?」明明係大國崛起,有乜理由只有日本嘅規矩先至可以做「大國規矩」啫?

好明顯,某乙唔明白有一個普世道理,就係「有付出唔等如大乜晒!」,尤其是想要一啲「搭錯線」嘅嘢。

付出咗買AV嘅錢....AV睇囉;付出咗買地嘅錢....有地起樓囉。邏輯上係引伸唔出:買咗AV就要送埋個AV女優,亦都聯想唔到,買咗塊地要送埋個海邊俾你喎。至於俾咗人工就以為可以無限加班,又或者以前有出過血汗(某乙唔止出咁少添,精...神都出埋),因此尚未試過俾人搵笨、做牛做馬嘅廢青就一定要收聲之類。(請參考以上例1分析)

咁當然,呢啲「付出咗就有權要求,冇付出就冇權要求」嘅神邏輯,絕對唔係我胡思亂想就可以參透得到嘅。留番俾啲天才自己正確解讀啦。



沒有留言:

張貼留言